Saturday, October 15, 2022

बिल्हा जनपद प्राथमिक इसकूल म संकुल इसतरीय टी एल एम मेला होइस संपन्न

'हमसफर मित्र न्यूज'

बिल्हा। बिल्हा विकास खंड के कन्या बिल्हा संकुल के जनपद प्राथमिक इसकूल बिल्हा म 14 अक्टूबर 2022 शुकवार के दिन संकुल इसतरीय भव्य टी एल एम मेला होइस । मेला के सुरु भारतीय संस्कीरिती परम्परा के अनुसार गियान के देवी दाई सरस्वती के पूजा-पाठ ले होइस। सरस्वती पूजा श्री केशव वर्मा सर, श्री जोसफ खलखो सर, साधराम मरकाम सर , श्री रामजी चतुर्वेदी सर मन करिन । जेखर बाद श्री वर्मा सर जी ह टी एल एम मेला अउ टी एल एम के बारे म सुघ्घर ढंग ले बताइस। श्री वर्मा सर ह बताइस कि TLM के माध्यम ले गुरुजी, मेडम मन जब लइकामन ल कोनो भी विषय के पाठ ल पढ़ाथे त लइकामन जल्दी उंकर बारे म समझजाथे अउ ये समझ ह इसथाई समझ होथे जेला लइकामन नइ भुलाय। TLM के माध्यम ले लइकामन कोनो भी विषय के पाठ ल *करके* सीखथे जेखर ले ओ गियान के सुरता अड़बड़ दिन ले रइथे। उठवा TLM ले, गुरुजी मन के बनाय TLM ह बने होथे अउ सस्ता घलो रइथे। ये सब्बो गोठ ल वर्मा सर जी बड़ सुघ्घर ढंग के बिस्तार ले बताइस।

ये संकुल इसतरीय मेला म बिल्हा संकुल के जम्मो प्राथमिक इसकूल अउ मिडिल इसकूल के सब्बो गुरुजी, मेडम मन TLM बना के एक जघा जुरिया के ये मेला के शोभा ल बड़हाइस । सब्बो गुरुजी मन बड़ सुघ्घर किसिम-किसिम के सब्बो विषय के TLM बना के लाय रहिन। जेखर ले ये मेला ठउर ह बड़ सुघ्घर दिखत रहिस। जउन ल देख के गुरुजी मन के संगे-संग बिल्हा नगर के आय लोगनमन के मन ह घलो मगन हो गिस।

ये मेला ह गुरुजी मन बर सीखे अउ सिखाय के एक मंच दिस। जउन म सब्बो गुरुजी मन अपन-अपन ढंग ले बनाय TLM के स्टॉल लगाय रहिन। सब्बो गुरुजी मन पारी - पारी अपन - अपन TLM के बारे मन म अपन- अपन भाखा मा बड़ विस्तार ले बताइस। गुरुजी मन द्वारा पढ़ाय बर, येला कइसे-कइसे बउरथे अउ लइकामन का-का सीखथे, तेन विषय म बड़ सुघ्घर ढंग ले बताइस।

श्री वर्मा सर जी ह सब्बो गुरुजी मन ल कहिस कि एसने सुघ्घर TLM बनाके लइकामन ल पढ़हावत रहव संगे-संग श्री वर्मा सर जी ह सब ल बधाई अउ शुभकामनाएं दिस। येखर बाद छत्तीसगढ़ के परसिद्ध वरिष्ठ गीतकार श्री केदार दूबे जी TLM के बारे म गुरुजी मन ल बड़ सुग्घर अउ सरल ढंग ले बताइस। कार्यक्रम के आखिर म श्री कौशिक द्वारा आभार प्रगट करिस अउ मेला सिराय के घोषना करिस ।